Ақмола облысында зейнеткер елорда тұрғынына пышақ жарақатын салған, – деп хабарлайды Polisia.kz.
6 тамызда Целиноград аудандық полиция бөліміне Нұр-Сұлтан қаласының ЖБО жедел кезекшісінен елордалық ауруханаға «іш қуысының кесіп-шаншып енген жарасы» диагнозымен елордалық тұрғын жүгінгені туралы телефон хабарламасы келіп түсті. Зардап шегуші Целиноград ауданының Қараөткел ауылынан жеткізілді.
Жедел-іздестіру іс-шаралары барысында полиция қызметкерлері 52 жастағы ер адамға пышақ жарақатын салды деген күдікпен 71 жастағы елорда тұрғынын анықтады. Қарт адам жасаған ісін мойындады.
Аталған фактіге сәйкес ҚР ҚК 106-бабының 1-бөлігі «Денсаулыққа қасақана ауыр зиян келтіру» бойынша сотқа дейінгі тергеу басталды.
