Әке жолын жалғаған Әйгерім
Полиция капитаны Әйгерім Төрегелдиева – Түркістан қалалық полиция басқармасы ЖПҚ-нің учаскелік полиция инспекторы қызметінде бес жылдан бері қызмет етіп келеді, – деп хабарлайды Polisia.kz.
Ол кішкентай кезінен әкесіне ұқсап форма киіп, ел тыныштығын қорғайтын полицей болғысы келеді. Осы жолда қанаты талмай, еңбектенеді. Арманмен алға қадам басады. Инемен құдық қазғандай білім қуады.
Нақтырақ айтсақ, туған қаласы – Түркістанда Қожа Ахмет Яссауи атындағы ХҚТУ-нің заң факультетіне оқуға түседі. Жоғары оқу орнын 2004 жылы тәмамдап, алғашқы еңбек жолын осы университеттің оқу бөлімінде бастайды. 2007-2009 жылдар аралығында аталған университеттің магистратурасын бітіріп, құқық магистрі академиялық дәрежесін алады. Бұдан кейін 2012-2015 жылдар аралығында магистр оқытушысы қызметін атқарады. Осы жылдарда заң факультетінде РһD доктарантурасында оқыған ол, бүгінде РһD докторы ғылыми дәрежесін алған жан. Ал, ішкі істер саласында қызметке 2015 жылы кіреді. Қиын да қауіпті саладағы қызметі мен отбасын қатар алып жүрген сақшы Әйгерім бір ұл, бір қызды тәрбиелеп отырған аяулы ана.
Қызының осы саланы таңдап, өз жолын жалғастырғаны үшін әкесі Айдархан дән риза. Одан бөлек, бұл отбасында әкесі мен әпкесінің ізінен еріп, інісі Мейірман Төрегелдиев та осы саланың білікті қызметкері атанған. Бүгінде Төрегелдиевтер әулетінде үрдіске айналған бұл шенді қызметтің жауапкершілігі шынымен ауыр. Соны қайыспай көтеріп, ілгері қарай қарыштай қадам басқан отбасының жауапкершілігі оның ішінде Әйгерімдей жаны нәзік қыз баланың қайсарлығы көрген жанды тәнті етпей қоймайды. Сондықтан антына адалдық танытып, әке аманатын абыроймен арқалай білген Әйгерімге сәттілік тілейміз!