Павлодарлық полицейлер 11 тоннадан астам есірткіні жойды, – деп хабарлайды Polisia.kz.
Мемлекет басшысы 2021 жылғы 1 қыркүйектегі Қазақстан халқына арналған Жолдауында былай деді: “Болашақ ұрпақтың әл-ауқатына есірткінің, оның ішінде синтетикалық есірткінің таралуы қауіп төндіреді. Құқық қорғау органдарына бұл инфекцияның біздің азаматтарымыз арасында, әсіресе жастар арасында таралуына күшті тосқауыл қою тапсырылды”. Осы тапсырманы орындау барысында Павлодар облысының аумағында жойылған есірткі құралдарының көлемі – 11 тонна 260 келіден астам, жалпы сомасы 23 млн теңгені құрады.
– Айта кету керек, сот үкімі бойынша қылмыстық істер бойынша барлық заттай дәлелдемелер жойылуға жатады: “көк шөптің” өзі және оны дайындауға арналған құрылғылар, – деді Павлодар облысы ПД Есірткі қылмысына қарсы іс-қимыл басқармасының бастығы Мәлік Оңғарбаев.
Комиссия бірқатар қылмыстық істер бойынша қаралып жатқан есірткілерді өртеп жіберді.
Биыл ауырлығы әртүрлі дәрежедегі есірткіге байланысты 22 қылмыстық іс тергеліп, сотқа жолданды, заңсыз айналымнан 24 келіден астам есірткі мен психотроптық заттар алынды.
Полиция департаменті есірткінің заңсыз айналымы саласындағы қылмыстар қылмыстық жауапкершілікке әкелетінін ескертеді.
Есірткінің заңсыз айналымына байланысты құқыққа қарсы қызмет фактілері туралы азаматтар 8 (7182) 39-10-38 немесе “102” сенім телефоны, сондай-ақ”Police 102″ мобильді қосымшасы арқылы хабарлай алады.
