Жамбыл облысында бір айда заңсыз айналымнан 60 қару тәркіленді, – деп хабарлайды Polisia.kz.
Жамбыл облысының полиция департаменті қаңтар оқиғасы кезінде ұрланған, заңсыз сақталған қаруды іздеу және тәркілеу жұмыстарын жалғастыруда. Осы мақсатта сәуір айының соңында полиция қызметкерлері “Қару” жедел алдын алу іс-шарасын өткізді. Іс-шараның 5 күнінде полицейлер заңсыз айналымнан 54 бірлік қару, 448 оқ-дәрі, 1 жарық-шу гранатасын, 9 арнайы құралдарды тәркіледі. Бұл туралы Жамбыл облысы ПД бастығының орынбасары Нұржан Рахметуллаев айтты.
Алынған барлық құралдарға сот-баллистикалық сараптамалар тағайындалды. Полиция қызметкерлері қару иелерінің тұрғылықты жері бойынша, сондай-ақ 704 шалғайдағы шаруа қожалығына тексеру жұмыстарын жүргізді. Жедел алдын алу іс-шарасы барысында 21 адам әкімшілік жауапкершілікке тартылды, оның ішінде қаруды сақтау ережелерін бұзудың 15 дерегі, қаруды қайта тіркеуді бұзудың 6 фактісі анықталды.
Биылғы сәуір айында заңсыз айналымнан 60 бірлік қару мен 1183 оқ тәркіленді. Мәселен, полиция қызметкерлері жедел-іздестіру шаралары кезінде облыс орталығындағы Солнечный иінінің шет жағында қару-жарақ пен оқ-дәрі салынған полипропилен пакетін тапты. Онда Жамбыл облысы ПД қоймасынан ұрланған 5,45 мм калибрлі АКС-74 автоматы, 12 мм калибрлі ИЖ-54 екі ұңғылы аңшы мылтығы, 16 мм калибрлі ИЖ-ЗК бір ұңғылы аңшы мылтығы, ИЖ-18ЕМ 16 мм калибрлі тегіс ұңғылы аңшы мылтығы, 16 мм калибрлі ИЖ-58 бір ұңғылы шолақ аңшы мылтығы тәркіленді.
Аталған дерекке қатысты ҚР ҚК-нің 287-бабы 3-бөлімінің (Қаруды, оқ-дәрілерді, жарылғыш заттар мен жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру) бойынша сотқа дейінгі тергеу амалдары басталды.
