Қостанайда "Жасөспірім" жедел-профилактикалық іс-шарасы аясында рейдтер жалғасуда, - деп хабарлайды Polisia.kz.
Қостанай қаласында кәмелетке толмағандардың құқықтарын қорғауға бағытталған "Жасөспірім" жедел-профилактикалық іс-шарасы жалғасуда. Осы бастама шеңберінде ювеналды полиция бөлімшесінің қызметкерлері ұйымдасқан қылмысқа қарсы күрес басқармасы және криминалдық полиция басқармасымен бірлесе отырып, қаладағы ойын-сауық орындарын қамтитын рейдтер өткізіп жатыр.
Рейдтің басты мақсаты — кәмелетке толмағандардың түнгі уақытта ата-анасыз немесе заңды өкілдерінсіз қоғамдық орындарда жүруін болдырмау, сондай-ақ жасөспірімдердің құқықтарын қорғау туралы заңнаманың орындалуын қамтамасыз ету. Түнгі клубтар, дәмханалар мен басқа да көңіл көтеру нысандары — басты назарда.
Тексеру барысында полицейлер жасөспірімдермен профилактикалық әңгімелер өткізіп, заңнамадағы шектеулер туралы түсіндіреді. Сонымен қатар мекеме иелеріне кәмелетке толмағандарды түнгі уақытта қабылдағаны үшін көзделген әкімшілік жауапкершілік жайында ескерту жасалады.
Аталған іс-шаралар жасөспірімдер арасындағы құқық бұзушылықтың алдын алуға, теріс ықпалдардың ықтималдығын төмендетуге және жауапкершілік сезімін қалыптастыруға бағытталған.
