Маңғыстаулық полицейлер ерікті жастармен бірге граффити жазуларды өшірді,-деп хабарлайды Polisia.kz.
Маңғыстау облысы Полиция департаменті Есірткіге қарсы іс-қимыл басқармасы Ақтау қаласы «Арман» жастар орталығының ерікті жастарымен бірге қала аумағындағы граффити жазуларды өшіруде.
Мақсаты — есірткіден азат қоғамды қалыптастыру, жастар арасында саламатты және салауатты өмір салтын насихаттау, бүкіләлемдік зұлматқа айналып отырған дерттің кең етек алуын болдырмау.
Қала үйлерінің, ғимараттардың жанында орын алған бұл жазуларда интернет сайттар арқылы заңсыз есірткі заттарын таратушының мекен-жайлары жарнамаланған.
5 шағын ауданның тұрғыны жастардың бұл игі істерін қолдап, ұйымдастырушыларға алғысын білдірді.
Полиция департаменті жастарды саламатты өмір салтын ұстануға шақырады. Дені сау ұрпақ — жарқын болашақ!
