СҚО-да тағы екі ауыл ішімдіктен бас тартты. Бұл ауылдарда соңғы жылдары бірде-бір қылмыс тіркелмеген, – деп хабарлайды Polisia.kz.
Солтүстік Қазақстанда ішімдіктен бас тартқан ауылдардың саны артып келеді. Айыртау ауданында Қарасай батыр және Бірлестік ауылдары 5, 7 жыл бұрын алкогольден бас тартты. Екі жағдайда да ақсақалдардың бастамасымен болды. Халық ақсақалдардың ұсынысын қолдады. Ауылдағы дүкендердің иелері де келісті – ұзақ уақыт алкогольге сұраныс болмаған.
Қарасай ауылының халқы – 263 адам. Мұнда қылмысқа немесе отбасылық дау-дамайға қатысты қиындықтар жоқ. Арықбалық ауылдық округінің учаскелік полиция инспекторы Абылайхан Рамазанов осы өлкеде 6 жылдан бері қызмет етіп келеді. Сол уақыттың өзінде ауыл республиканың солтүстігіндегі ең тыныш ауылдардың бірі ретінде белгілі болды. Абылайхан ауылға профилактикалық әңгімелесу жүргізу үшін ғана барады – ауыл тұрғындарына интернет-алаяқтық қаупі туралы айтып, оқушылардың құқықтық сауаттылығын арттыруға ат салысады.
Қамсақты ауылдық округіне қызмет көрсететін учаскелік инспектордың көмекшісі Біржан Мукеевке Бірлестіктің 486 тұрғыны қиындық туғызбайды. Соңғы жылдары мұнда тек бір рет ғана жедел тергеу тобы шығып, мал ұрлығының ықтимал фактісін тексеруге барды. Бірақ қылмыс расталған жоқ, себебі жоғалған сиыр мұзға батып кеткен.
Екі ауылда да спорт дамып келеді. Жастар негізінен Петропавлда немесе Көкшетауда жұмыс істейді, бірақ үнемі туған жерлеріне барып тұрады. Барлық іс-шаралар алкогольсіз өтеді – ұлттық ойындар мен жарыстардың арқасында да көңіл көтеруге болады. Бұл ретте, Қарасай ауылы атақты батырдың мемориалымен танымал екендігін айта кеткен жөн. Мұнда адамдар тарихқа үңілу үшін келеді. Ауыл тұрғындары өздерінің байсалдылық пен жеке бастарының тәртібін Отанымыздың өткен күндеріне құрмет көрсету деп біледі.
– Адамдардың алкогольден бас тартуы полицияға үлкен көмек. Тәжірибе көрсеткендей: елді мекендерде алкогольді тұтыну неғұрлым аз болса, соғұрлым тыныш өмір сүруге болады. Айыртау ауданының полиция бөлімінде барлығы 22 учаскелік полиция инспекторы және олардың 6 көмекшісі қызмет атқарады. Полиция қызметкерлері тұрақты түрде қылмыс пен құқық бұзушылықтың алдын ала отыра, халықпен сенімді серіктестік орнатып, ішімдіктен бас тартқан ауылдардың қолға алған оң тәжірибесін одан әрі дамытуға тырысады, – дейді аудандық полиция бөлімінің бастығы Марат Серкешев.
