Абай облысы бойынша ҚАЖД мекемесінде ерекше оқиға болды — 55 жастағы сотталған әйел 58 жастағы сүйіктісімен ресми түрде некеге тұрды, – деп хабарлайды Polisia.kz.
Ерлі-зайыптылардың махаббат тарихы 25 жылдан астам уақытқа созылады.
Осы уақыт бойы олар азаматтық некеде өмір сүріп, ортақ шаруашылық жүргізіп, еңбек етіп, өзара сенім мен сыйластыққа негізделген берік қарым-қатынас қалыптастырған.
Некені ресми тіркеуге олар аса мән бермеген, отбасы үшін ең бастысы — шынайы сезім деп санаған. Алайда алаяқтық жасағаны үшін әйел алты жылға бас бостандығынан айырылып, жазасын өтеу үшін Абай облысындағы әйелдер колониясына жіберілді.
Мекемеге келгеннен кейін сотталған әйелді азаматтық жұбайы қарым-қатынасты үзіп кетуі мүмкін деген алаңдаушылық мазалаған.
Бірақ бұл күдік орынсыз болып шықты. Біраз уақыттан кейін ер адам қарым-қатынасты заңдастыруға нық шешім қабылдап, мекемеге келді. Ол бұл күнді ерекше ету үшін гүл шоғын және қалыңдық көйлегін ала келген.
Мекеме әкімшілігінің қолдауымен шағын, бірақ әсерлі неке қию рәсімі ұйымдастырылды. Жұбайлар неке сақиналарымен алмасып, ресми түрде некелерін тіркеп, отбасылық өмірдің жаңа кезеңін бастады.
– Мен үшін бұл – ең бақытты күндердің бірі. Осында отырғаныма қарамастан, өзімді қайтадан жас қалыңдықтай сезіндім. Арадағы қашықтық біздің сезіміміздің қаншалықты мықты екенін дәлелдеді. 25 жыл бірге өмір сүргеннен кейін некемізді тіркемейміз деп ойлаған едік. Бүгінгі күн мен үшін – нағыз ғажайып. Осы сәтті өткізуге мүмкіндік берген мекеме қызметкерлеріне алғысымды білдіремін, – деді сотталған әйел.
Қылмыстық-атқару жүйесі мекемелерінде мұндай іс-шаралар отбасы институтын нығайтуға, сотталғандардың моральдық жағдайын қолдауға және оларды бостандыққа шыққаннан кейін қоғамға бейімдеуге бағытталған.
– Отбасылық байланыстарды сақтау және нығайту – сотталғандармен жүргізілетін тәрбиелік жұмыстың негізгі бағыттарының бірі. Мұндай шаралар олардың түзелуге деген ынтасын арттырып, қоғамға қайта бейімделуіне ықпал етеді. Біз әрқашан осындай бастамаларды қолдаймыз, өйткені отбасы қайта әлеуметтену процесінде маңызды рөл атқарады, – деді мекеме бастығының орынбасары Ақмарал Қайранова.
